Ateak zabalik

Gaur goizean Durangoko 19. Euskal Dendak  zabaldu ditu ateak.  Astelehenera arte bisitariek Euskal Herriko edozein lurraldetatik  etorritako artisauen lanak ikusteko aukera izango dute. Auten 50 artisauk parte hartuko dute eta aurten Okzitania kultura izango da protagonista, kultura gonbidatua izango baita.

            Lehenengo ordutik egon da gainezka merkatu plaza. Umeek eta nagusiek artisauekin gozatu dute eta horrela jarraitzea espero du Arbaso Elkarteak. Aurtengo slogana honakoa da: “Ametsak gauzatu” eta berriro ere Euskal Denda Euskal Herriko artisautzaren erakusleihorik garrantzitsuena izango da.

            Inauguzaio ekitaldian Bernat Vidalek eta Durangoko alkateak, Aitziber Idigoras, moztu dute zinta. Han ere Durangoko zinegotziak Andoni Iruarrizaga, Ander Gorrotxategi eta Natxo Martínez ikusi ditugu eta haiekin batera Durangaldeko Amanomuneko presidentea Oskar Zarrabeitia, Durangoko Gerediagako Ana Alberdi. Eta haiekin batera Bizkaiko Foru Aldundiko Turismoko zuzendari naguasia, Gabino Martínez de Arenaza.

            Goizean ere Durangoko Santa Rita-San Antonio eskolako ikasleek bisita gidatu baten parte hartu dute eta sakon-sakon ezagutu dituzte parte hartzen duten artisauek.

             Euskal Denda diruen bitartean, azoka-lekuan hainbat ekintza burutuko dira. Bisitariak aukera izango du jolasetan eta lehiaketetan parte hartzeko. Gazteenei  tailer espezifikoak eskainiko zaizkie, bereziki eurentzat diseinatuak eta arrakasta handia dutenak, besteak beste, karameluak egitea edo zetazko zapia margotzea.  

Parte hartzaileak

            Euskal Dendak Euskal Herriko lurralde guztietako ordezkariak izango ditu. Guztira 50 erakusketari bilduko ditu, artisau arabar, baxenafar, bizkaitar, gipuzkoar, lapurtar eta nafarrak. Aurreko edizioetako kopuru antzekoa, baina nobedade moduan, aipatu behar da, aurten, hamabost profesionalek lehenengo aldiz parte hartuko dutela.            

            Beste behin ere, Bizkaia izango da ordezkari gehien izango dituen lurraldea, 19 artisau, hain zuzen ere. Gipuzkoak 17 izango ditu, Nafarroak 4, Arabak 3, Nafarroa Beherak 2 eta Lapurdik bat. Betidanik izan da Durangaldea artisautzaren epizentro garrantzitsua. Aurten ez da gutxiago izango, Bizkaiko eskualde honen izena bost artisauk eramango dute. Durangoko Restaurarte, 2010eko stand onena sariaren irabazlea; Jaio Gazta, gazta ekoizle iurretarra; Elorrioko Wandel, larrua lantzen duen sortzailea eta iazko stand onena saria jaso zuena aurten ere Euskal Dendan izango da. Esparru hau Bea Unzuetak eta Eneko Unzaluk biribilduko dute.

Sektorekako ordezkaritzari dagokionez, honakoak izango ditugu: sei nekazaritzako elikagaien arlokoak, lau beirakoak, hamar metalekoak. Halaber, landare zuntzak lantzen duten bi, zeramikako bost eta egurra lantzen duten zazpi izango dira aurtengoan. Ehungintzari dagokionez, zazpi erakusketari aipatu behar ditugu, eta larrugintzan lau. Gainera, denbora eta espazioa emango zaizkie zaharberritzaile bati, euskal kirolari eta kosmetikari. Birziklatutako gaiek ere erakusmahaia izango dute.

Erakusketari berriak hamabost izango dira. Lehen aldiz etorriko dira Bizkaitik Sua Joyeros, Argentcolor eta Evaren Bitxiak, eta Gipuzkoatik Shuaia Bitxiak eta Pitxipolit.  Berriak izango dira Davina de Diego eta Idoia Musa, lehena bizkaitarra, bigarrena gipuzkoarra eta biak originalak. Nekazaritzako elikagaien ekoizleen artean, Arnabar eta Betikogia izango dira berriak. Lehendabiziko Euskal Denda izango da Martina Menke eta Mai KyKrentzat, biek ehuna lantzen duten artisauak, eta aurtengo azokan Lur Zeramikak eta Errealkubok ere parte hartuko dute.

Irungo Alberdi Makilak etorriko da Durangora. Ezin dugu ahaztu orain dela bi urte saga honen aitak, Iñakik, Bizitza Osoa Artetsu Saria jaso zuela. Hark lana egiteari  utzi zion, alabaina, seme-alabek hartu dute tailerra.

Okzitania

            Aurtengo Euskal Dendaren edizioaren kultura gonbidatua Okzitania izango da. Gertu daukagu Okzitania, hala ere, herri ezezaguna egiten zaigu, egoera hori gainditzeko  hango lau artisau etorriko dira. Beraei esker haien ohiturak eta usadioak ezagutuko ditugu.

            Lleidatik Taller Bausen etorriko da, baita harria lantzen duen Ariza tailerra ere, eta egurrezko tailerra Pcorfer eta Piers Bausen. Hauek laurok euren artisautza eta berezitasuna aurkeztuko dizkigute, eta euren kulturan murgilduko gaituzte.

Artetsu Sariak

             Euskal Denda da-eta, Arbasok  Artetsu Sariak banatzeko aprobetxatuko du. Sari hauen bitartez, banakakoen edota entitateen lana aintzat hartu nahi dugu. Halaber, konplizitaterako bidea eta loturak sortu nahi ditugu aipaturiko lan hori apurka-apurka hazten joan dadin eta, era horretan, gure artisautzaren aldeko hain garrantzitsua den kontzientziazioa ere eragingo dugu. 

              Horregatik bada, zentzu guztietan artisautzaren alde egiten duten artisauak, erakundeak eta hedabideak saritzen ditugu. Hamargarren edizio honetako Artetsu sariak honakoak izango dira, Lurbe Zeramika (Itziar Begoa eta Gloria Etayo) Bizitza osoa kategorian, Sondikako Udalak Erakundea langun saria hartuko du, Berriak Hedabidea, Aranzadi Zientzia Elkarteak Gure Tradizioak Hedatzea eta Korrikak Euskara sustatzea.

            Sariak emateko gala gaur, abendua 5, egingo da San Agustin Kultur Gunean, arratsaldeko 20:00etan.