Badator badator, Euskal Denda badator

Astiro astiro goaz, hala ere, abendua laster izango da hemen eta, hile honekin batera, Durangoko 19. Euskal Denda helduko zaigu. Arbasok, artisauen elkarte nazionala, Euskal Herriko artisautzaren erakusleiho garrantzitsutzat hartzen dutena antolatu du, berriro ere. Durangoko merkatu plazan egingo da abenduaren 5etik 8ra, “Ametsak gauzatu” lelopean. Euskal Denda dirauen bitartean, hainbat ekintza ludiko egingo dira azoka barruan artisauaren eta bisitarien arteko interakzioa dinamizatzeko eta, azken batean, bisitaria artisautzaren munduan sararazteko. Horrela azaldu dute aurkezpenean, Bernat Vidalek, Arbasoko presidentea, Olatz Pujanak, Arbasoko bozeramailea eta Andoni Iruarrizagak, Durangoko zinegotzia.

Euskal Dendak Euskal Herriko lurralde guztietako ordezkariak izango ditu. Guztira 50 erakusketari bilduko ditu, artisau arabar, baxenafar, bizkaitar, gipuzkoar, lapurtar eta nafarrak. Aurreko edizioetako kopuru antzekoa, baina nobedade moduan, aipatu behar da, aurten, hamabost profesionalek lehenengo aldiz parte hartuko dutela.

Beste behin ere, Bizkaia izango da ordezkari gehien izango dituen lurraldea, 19 artisau, hain zuzen ere. Gipuzkoak 17 izango ditu, Nafarroak 4, Arabak 3, Nafarroa Beherak 2 eta Lapurdik bat. Betidanik izan da Durangaldea artisautzaren epizentro garrantzitsua. Aurten ez da gutxiago izango, Bizkaiko eskualde honen izena bost artisauk eramango dute. Durangoko Restaurarte, 2010eko stand onena sariaren irabazlea; Jaio Gazta, gazta ekoizle iurretarra; Elorrioko Wandel, larrua lantzen duen sortzailea eta iazko stand onena saria jaso zuena aurten ere Euskal Dendan izango da. Esparru hau Bea Unzuetak eta Eneko Unzaluk biribilduko dute.

Sektorekako ordezkaritzari dagokionez, honakoak izango ditugu: sei nekazaritzako elikagaien arlokoak, lau beirakoak, hamar metalekoak. Halaber, landare zuntzak lantzen duten bi, zeramikako bost eta egurra lantzen duten zazpi izango dira aurtengoan. Ehungintzari dagokionez, zazpi erakusketari aipatu behar ditugu, eta larrugintzan lau. Gainera, denbora eta espazioa emango zaizkie zaharberritzaile bati, euskal kirolari eta kosmetikari. Birziklatutako gaiek ere erakusmahaia izango dute.

OKZITANIA

Aurtengo Euskal Dendaren edizioaren kultura gonbidatua Okzitania izango da. Gertu daukagu Okzitania, hala ere, herri ezezaguna egiten zaigu, egoera hori gainditzeko hango lau artisau etorriko dira. Beraei esker haien ohiturak eta usadioak ezagutuko ditugu.

Lleidatik Taller Bausen etorriko da, baita harria lantzen duen Ariza tailerra ere, eta egurrezko tailerra Pcorfer eta Piers Bausen. Hauek laurok euren artisautza eta berezitasuna aurkeztuko dizkigute, eta euren kulturan murgilduko gaituzte.

ARTETSU SARIAK

2005ean hasi ginen Artetsu sariak ematen, Arbaso elkartearen hamargarren urteurrenarekin batera. Sari hauen bitartez, banakakoen edota entitateen lana aintzat hartu nahi dugu. Halaber, konplizitaterako bidea eta loturak sortu nahi ditugu aipaturiko lan hori apurka-apurka hazten joan dadin eta, era horretan, gure artisautzaren aldeko hain garrantzitsua den kontzientziazioa ere eragingo dugu.

Horregatik bada, zentzu guztietan artisautzaren alde egiten duten artisauak, erakundeak eta hedabideak saritzen ditugu. Hamargarren edizio honetako Artetsu sariak honakoak izango dira:

BIZITZA OSOA: Lurbe Zeramika. Itziar Begoa eta Gloria Etayo.

ERAKUNDEAK LAGUN: Sondikako Udala.

HEDABIDEAK: BERRIA.

GURE TRADIZIOAK HEDATZEA: Aranzadi.

EUSKARA SUSTATZEA: Korrika.

Sariak emateko gala abenduaren 5an, ostiralean, egingo da San Agustin Kultur Gunean, arratsaldeko 20:00etan. Sariaren ikurra esku bat da, gai eta tresna nahitaezkoa, ezinbestekoa artisautzan jarduteko. Beiraz eginiko alegoria bat da, gardentasuna, argia, ardura eta lan-xehetasuna adierazten dituena. Egilea, Bilboko Iker Sanz da, Iger by Aker artisau-tailerrekoa.